عريس من ع النت .. !!, متجدد باستمرار

تركت عفاف الكمبيوتر التي تقضى عليه معظم وقتها فجأة

وصرخت بصوت عالى

مااااما , يا ماماااااااااااااااا , يا ماماااااااااااااااا

الأم : فيه إيه يابت بالراحة إخواتك نايمين

عفاف : معلش يا ماما أصلى فرحانة

فرحانة اوي اوي

الأم : خير يا بنتى .. ؟ فرحينى معاكي كدا ربنا يفرح قلبك

عفاف : عريس يا ماما عريس

الأم فرحة : يا ألف نهار أبيض يا ألف نهار مبروك

لولولولولولولولولولولولولولوى


وبعد دقيقتين أحضان وقبلات تذكرت الأم

الأم : ألا قوليلى يابت

عريس مين ده اللي هيتقدملك

وماقلتليش من ساعة ما جيتى من الجامعة ليه .. ؟

عفاف : لأنى لسة عارفة دلوقتى حالا يا ماما

الأم بإستغراب : عارفة دلوقتى حالا .. ؟

!!

عارفة منين يابت دة انتى لسة قايمة دلوقتي من قدام الكبورر

عفاف ضاحكة : كبورر ايه بس يا ست الكل

اسمه كمبيوتر

الأم : مش مهم

المهم عرفتيه ازاى .. ؟

ومين أصلا العريس ده يعنى جاى منين .. ؟

عفاف : من النت يا ماما

ظلت الأم المسكينة تنظر لابنتها باستغراب

وهى تراجع كل ما تعرفه من كلمات

ولم تجد لكلمة النت أثر بينها

فسألت عفاف

الأم: النت .. ؟!! ودى تبقى فين دى يا بت .. ؟
!!

عفاف: فين ازاى يا ماما .. ؟

الأم: يعنى فينها من الدنيا الى احنا فيها .. ؟

تركبيلها مترو ولا اتوبيس و لا تأخديها تاكسى

اوعى يابت يكونوا بيروحولها بالقطر .. ؟

عفاف ضاحكة : ايه يا ماما الى انت بتقوليه ده .. ؟

مترو إيه وقطر إيه .. ؟!! ده النت

الأم : أيوة يا بنتى عرفنا انه الزفت

بس دة موقعه فى انه بلد بالظبط .. ؟

عفاف: فى كل البلاد يا ماما

الأم باستغراب : انتى اتهبلتى يا بت .. ؟

يعنى إيه فى كل البلاد .. ؟
!!

عفاف: يا ماما النت دة عبارة عن كمبيوترات كتير

في العالم وفيه معلومات كتير اوى

الأم : معلومات ايه يابت انتى

هو انتى هتتجوزى دايرة المعارف .. ؟
!!



عفاف : المهم يا ماما ان فى واحد متقدملى عن طريق النت

الأم : وده اتقدم ازاى يعنى .. ؟

عفاف : بعتلى إيميل

الأم فى ذهول : ايميل .. ؟
!!

بعتلك إيميل جارنا المسيحى .. ؟
!!

وإزاى يا بت تقبلى تتكلمى مع الى اسمه إيميل ده

وهو مين عشان الزفت بتاعك ده يبعته لينا .. ؟
!!

عفاف فى سرها طب افهمها ازاى دى بقى .. ؟


عفاف:يا ماما اهدى إيميل جارنا مين بس

الأم : مش انتى الى بتقولى يابت

عفاف : إيميل يعنى جواب بس على النت

الأم : برضه هتقوليلي ع الزفت

يابنتى أنا مش فاهمة البتاع الى بتتكلمي عليه ده

عفاف : النت دة ياماما حاجة فى الكمبيوتر

ممكن نبعت فيها رسائل لناس برة

ونستقبل منهم رسائل برضه ده غير حاجات كتير

الأم : أنا ماليش فى الكلام ده

اللي انا عايزة أعرفه هو مين ومعاه شهادة ولا لأ .. ؟

واصله ايه وفصله ايه .. ؟

عفاف : هو اسمه حاتم

وطالب فى هندسة حاسبات

و قاطعتها الأم

طالب .. ؟
!!

عفاف : أيوة ياماما بس فى آخر سنة

الأم : بصى أنا ماليش دعوة بالموضوع دا أنا هتصل بأبوكي وهو يتصرف

اتصلى بيه انتى عالموبايل وأنا أكلمه

زمانه عالقهوة

وفى قهوة المعلم حسنين

رن الموبايل بتاع عم حلاوة العنتبلى الجزار

!!

يــتــبــعــ

مشاركة #2


لاعب أساسى


المجموعة: الأعضاء
المشاركات: 124
التسجيل: 17-January 07
رقم العضوية.: 295



حلاوة العنتبلى وبصوت خشن : أيوة مين .. ؟

الأم : أنا يا معلم

العنتبلى : عاوزة إيه يا ولية .. ؟

الأم : تعالى يا خويا شوف بنتك جايلها عريس من النت

العنتبلى : بتقولى منين .. ؟

الأم : من النت يا حاج

العنتبلى : يعنى إيه .. ؟!! فهمينى

الأم : ياخويا لما أفهم أنا ابقى أفهمك

تعالى انت واسألها بنفسك

العنتبلى : ماشى , هخلص دور الطاولة ده وهاجى على طول

ثم أغلق الموبايل وأخذ يكلم نفسه

نت .. !! دة يطلع ايه دة كمان .. ؟

تكونشى الولية مراتى اتهبلت .. ؟

بس هى ناقصة هبل .. ؟!! ماهيا كدا كدا مهبولة من يومها

سأله صاحبه الذى يلاعبه الطاولة : مالك يا معلم حلاوة .. ؟ انت بتكلم نفسك ولا ايه ..؟

فانتبه المعلم حلاوة العنتبلى لصاحبه و قال : قولى يا زينهم

بما إنك كدا متعلم ومتنور ومعاك تالتة ابتدائى

يطلع إيه النت ده .. ؟

طبعا المعلم زينهم اترسم بقى وأخذ وضع فخر وعزة وهو يجيب

وإنت ايه اللي عرفك بالأشكال دى يا معلم .. ؟
!!


العنتبلى : اهو عرفت وخلاص بقى

زينهم : والله يا معلم حلاوة

أنا سمعت مرة البت بنت أخت عمة جار خالتى بتقول انها شافت على النت صور

لمذابح بتحصل فى العراق

العنتبلى : ااااااااااااه

يعنى زى تليفزيون كدة يعنى

زينهم : لا يا معلم مش زى التليفزيون

وإنما تقدر تقول عليه جرايد بس بتتشاف على الكمبيوتر

العنتبلى : يا دين النبى
!!

معقولة ياد الجرنال يدخل ع الشاشة الصغيرة دى .. ؟!! طب بيدخلوه ازاى .. ؟
!!

زينهم وقال عامل فيها فكيك بقى : مش فى فتحات ورا فى الشاشة يا معلم

أكيد بيدخلوا الجرنال منها

العنتبلى :أكيد الناس دى فاضية وموراهاش أى حاجة تعملها

زينهم : هو كدة بالضبط يا معلم

بس ليه دة كله .. ؟

العنتبلى : أصل الولية مراتى بتقولى بنتك جايلها عريس من النت

زينهم : ألف مبروك يا معلم

أكيد تقصد ان متقدملها صحفى .. !!

العنتبلى وهو مبسوط : بجد ياد يا زينهم .. ؟

زينهم : طبعا يا معلم

ماهو زى ما قلتلك النت عبارة عن جرايد ع الكمبيوتر

يبقى قصدها ان واحد جرنالجى اتقدملها

مبروووك يا معلم

كدة ممكن تعمل دعاية للمحل بتاعك فى الجرنال

وتطلع صورك انت والعجل فى صفحة الحوادث
!!


العنتبلى: طب العب يا وش السعد العب

رمى زينهم الزهر ثم صرخ , دش

راحت عليك يا معلم

يــتــبــعــ

عفاف : يا ماما والنبي افهينى بقي عشان خاطرى

العريس دة لقطه ومفيش زيه فـ النت

أنا حبيته من كتاباته

الأم : كتاباته .. ؟!! هو مؤلف .. ؟

عفاف : مش مؤلف اوى يعنى بس بيكتب ع النت

الأم: وده بيكتب فى ايه بالضبط .. ؟

عفاف: لالالالالالالالا يا ماما

دا ما شاء الله عليه ماخلاش حاجة إلا لما كتب عنها

الأم بخبث : ااااااااااااااااااااااه

مين يشهد للعروسة .. ؟
!!

عفاف : لا والله ياماما بكلمك جد

الأم بصوت عالى : اسمعى يا بت انتى أنا لا أعرف نت و لا كتابات

أبوكى زمانه جاى دلوقتي هو بقي يتصرف معاكى

عفاف وفي سرها : ماهيا دى المصيبة

دخل المعلم حلاوة العنتبلى فى هذه اللحظة مبتهجا

العنتبلى : مساء الخير

الأم : يسعد مساك يا خويا

تعالى بقى شفلك حل فى بنتك دى

العنتبلى : خير يا بنتى .. ؟

عفاف : أبدا يا بابا

مش انتوا عاوزينى اتجوز

اهو جالى عريس ومع كدة ماما مش عاجبها
!!

العنتبلى : أكيد مش عاجبها عشان جاهلة

سيبك منها وقوليلى إيه الحكاية .. ؟

عفاف : فى واحد طلب ايدى عن طريق النت

وقالى انه جاد فى طلبه ومستعد يجي فى أى وقت

العنتبلى : عال عال

وإيه كمان .. ؟

عفاف: يعنى انت مش معارض يا بابا .. ؟

العنتبلى : واعارض ليه يا بنتى .. ؟
!!

عفاف فى فرح : طب ارد عليه اقوله ايه .. ؟

العنتبلى وبصوت خشن : تردي علي مين .. ؟
!!


عفاف : على حاتم يا بابا

العنتبلى وبصوت خشن :حااااااااتم ميــــــــــن .. ؟
!!

عفاف : العريس يا بابا

العنتبلى : اااااااااااااااه , مش تقوليلى كدة من الصبح

قوليلى الأول هو بيكتب فى أنه صفحة .. ؟

عفاف : يااااااااااااااااه يابابا

دة بيكتب فى صفحات كتيرة اوي اوي

العنتبلى : عظيم

وياترى بقى هو مشهور كدا يعنى الناس تعرفه .. ؟

عفاف : أكيد يا بابا ده معروف جدا فى المنتديات

العنتبلى : فين ياختى .. ؟

عفاف : فى المنتديات يا بابا

العنتبلى : ودى تطلع إيه دى كمان .. ؟

عفاف : دى صفحات ع النت يا بابا بتجمع أعضاء كتير اوووي

و بيتكلموا فى مواضيع كتير

العنتبلى : يابت سيبك من النحوى ده وكلمينى كلام افهمه

عفاف في سرها : بقى دة نحوى ياعالم
!!

عفاف : حاضر يا بابا

المنتديات دى زى

زى ايه قعدة المصطبة كده

كل مجموعة واخدلها ركن وعمالين يتكلموا فى حاجة معينة

وبيبقى لها شروط وقوانين معينة وكدة يعنى

العنتبلى : ااااااااااااااااااااه فهمت

يعنى زى سوق العجول كده

!!

عفاف وقد فاض بها : عجول ايه بس يابا .. ؟!! بقى المنتدى زى سوق العجول .. ؟
!!

العنتبلى : جرا ابه يابت انتي

مش عاجباكى العجول يا بنت عواطف .. ؟

مش العجول دى الى بناكل منها عيش وربتك انتى واخواتك لغاية ما كبرتى وبقيتى

عجلة زى أمك .. ؟

عفاف : طيب خلاص يا بابا

المهم انه مشهور , مشهور اوووي

العنتبلى : طيب نيجى للمهم بقى

هو عرفك منين .. ؟

شعرت عفاف بالرعب من السؤال فأجابك بسرعة

عفاف : لا يا بابا اوعى تفهمنى غلط

والله ما شافنى ولا مرة حتى فى أى حتة

العنتبلى : ماطبعا يا بنتى لأنه لو كان شافك مكانشى اتقدم أصلا

عفاف : وبعدين معاك بقى يا بابا , هو أنا وحشة اوي كدا .. ؟

العنتبلى مبتسما إبتسامة صفراء : يابت بضحك معاكى

انتى زى القمر بس عيبك الوحيد انك شبه أمك

!!

الأم : جرالك ايه يا راجل إنت ما تتعدل فى الكلام أحسنلك

العنتبلى : احم احم

كنا بنقول إيه يا عفاف .. ؟

عفاف : كنت بتسألنى هو عرفنى منين .. ؟

عموما هو عرفنى من النت

واتقدملى عن طريق النت

وإن شاء الله لو وافقتم هييجى يتقدملى على طول

العنتبلى : وماله يا بنتى خليه ييجى

عرفك من النت عرفك من السلخانه

مش فارقة المهم انه وقع على بوذه

عفاف فى سرها : ياخوفى من ألفاظكم دى الى تطفش 100 عريس مش عريس واحد بس

!!

العنتبلى : قوليله ييجى يوم الجمعة بعد العصر

عفاف مسرورة : حاضر يا بابا هقوله حالا

ودخلت مسرعة إلى حجرتها فاستعجب المعلم حلاوة العنتبلى وسألها العنتبلى :

هتعملى إيه يا بت .. ؟

عفاف : هقوله يا بابا

العنتبلى : انتى يا بت أخذتى التليفون عندك .. ؟

عفاف : لا يا بابا أبدا

العنتبلى : امال هتقوليله إزاى من عندك .. ؟

عفاف : هبعتله إيميل

صرخ الأب فجأة بصوت مزعج وعالى


وإيه الى جاب الواد إيميل عندك فى الأوضة .. ؟
!!

عفاف : يا بابا اهدى إيميل مين بس ده الى عندى

أنا أقصد هبعتله جواب عالنت

تذكر العنتبلى حواره مع زينهم والورق الذى يدخل من خلف الشاشة فقال :

اااااااااااااااااااااااااااه

أنا بحسب .. !! المهم بلغيه بالميعاد

وقبل أن يغادر إلتفت إليها قائلا : بقولك إيه يا عفاف

بعد ما تكتبى الجواب حطيه بالراحة عشان الشاشة ما تنفجرشى


تابعته عفاف بنظرات الدهشة والحيرة وهى تقول فى نفسها

احط إيه وشاشة إيه دى الى هتنفجر .. ؟
!!

وفى اليوم المحدد أتى العريس أنيقا مهتما بنفسه

بشكل ملحوظ وذو رائحة طيبة وفى أبهى صورة

واستبشر الجميع خيرا إلا أنه كما تعلمون هناك سوء تفاهم رهيب

فالأم تعرف أنه طالب فى كلية محترمة والأب يظنه صحفى مشهور

وعفاف مرعوبة من طريقة تعامل الوالدين مع العريس خاصة والدها

كما أن المفاجأة غير المتوقعة أن العريس جاء بمفرده

!!

يــتــبــعــ

رن جرس الشقة مرة واحدة

فأسرعت عفاف لفتح الباب

ولكن والدها أوقفها وأخبرها بأن تلزم غرفتها حتى ينادي عليها

ثم فتح هو الباب ليجد شابا وسيم وأنيق ذو رائحة طيبة وابتسامة هادئة

وبيده كيس موز
!!



استبشر حلاوة العنتبلى خيرا ودعاه للدخول

ولكنه أخذ ينظر وراءه فى تعجب لعدم وجود أحد معه

فأغلق الباب خلفه فى عنف وتغيرت ملامح وجهه وهو يقول , اهلاااااا


حاتم : اهلا بيك يا عمي


العنتبلى : خير يابنى .. ؟


حاتم وهو قلق : هى الانسة عفاف ما قالتش لحضرتك إني جاي .. ؟


العنتبلى : اه قالتلنا

بس ماقالتلناش بإن سيادتك هتشرف لوحدك

حاتم : لا ياعمى منا مش جاى لوحدى أنا معايا كيس موز


العنتبلى : لا يا شيخ كيس موز
!!


الأم : ياما جاب الغراب لأمه


حاتم : طيب يا عمى ندخل فى المفيد


العنتبلى : ندخل فى المفيد

وهو انت متأكد انك جاى تدخل فى المفيد .. ؟

حاتم : أكيد أكيد يا عمي امال أنا جاى ليه .. ؟


العنتبلى : وإن شاء الله هندخل فى المفيد بطولك كدة ولا ايه .. ؟
!!

من غير والدك ولا والدتك ولا عمك ولا خالك ولا أى حد


حاتم : لالالالالالالالالا يا عمي ماتقلقش

ماهو انتوا هتشوفوهم فى الفرح إن شاء الله

!!

وقف العنتبلى مرة واحدة صارخا: نعم يا خوياااااااااا .. ؟ فى الفرح .. ؟
!!

حاتم : اتفضل بس وأنا هفهمك على كل حاجة ياعمي

العنتبلى : ادينا اتفضلنا اهو , نعم .. ؟


أنا ياعمي اسمي حاتم

وعندى 22 سنة و4 أشهر و 5 أيام و 5ساعات و نص


الأم بعصبية : جرى اااااااايه يابنى انت .. ؟

كان زمانك اتجوزت وخلفت كمان


العنتبلى : استنى بس يا أم عفاف لما نشوف اخرتها ايه معاه


حاتم : أنا ياعمي عندى شقة واسعة والحمد لله وجاهزة ع الفرش


العنتبلى : اه واللي بعده


حاتم : بس كدا وجاى اطلب ايد الانسة عفاف

طبعا أنا عارف انكم مستغربين إني جيت لوحدى


العنتبلى : الله ينور عليك

هو دة بقى المفيد

وفين الحاج والحاجة .. ؟
!!


حاتم : أصل بصراحه كدا ياعمي

بصراحة

الحاج والحاجة مش مقنتعين بحكاية جوازى من النت دى


العنتبلى صارخا بوجهه : نعم يا حبيبى .. ؟

هو مين بقى اللي من النت انت ولا احنا .. ؟
!!


حاتم : احنا الإثنين يا عمي


العنتبلى : يابني انت هتلخبطنى ليـــــــــــه بقى .. ؟

أنا جزار مش صحفي

حاتم : طيب وفيها ايه دي يا عمى

طيب ماهو أنا طالب مش صحفى


العنتبلى صارخا : مش صحفى .. ؟

وكمان طاااااااااااالب
!!

الأم : امال انت فاكر ايه يا حاج ماهو طالب فى البتاعة دى

اللي بيشتغلوا فيها على الكبورر


العنتبلى : بقولك ايه خشي يا ولية نادي على عفاف


جاءت عفاف بسرعة ووالدها ينظر اليها بغضب

بينما ابتسم حاتم وهو يقول :

اهلا يا انسة عفاف


عفاف : اهلا بيك يا أستاذ حاتم


العنتبلى : اقعدى يا عفاف وشوفى المصيبة دى
!!


عفاف : مصيبة ايه بس يا بابا كفا الله الشر


العنتبلى : قال ايه البيه بيقولى انه طالب


عفاف : أيوة يا بابا منا عارفه ان هو طالب وفي هندسة الحاسبات فى اخر سنة


العنتبلى: نعم يااااااااااااااختى .. ؟

أنا كنت فاكره صحفى


حاتم : صحفى
!!

بس أناياعمي عمرى ماكنت صحفى ولا هكون


عفاف : استنى بس يا حاتم لوسمحت يظهر إن فيه سوء تفاهم حصل

وفاكرينك صحفى عشان أنا قلتلهم انك بتكتب فى المنتديات


ثم إلتفتت إلى والدها وهى تقول :

يا بابا الأستاذ حاتم بيكتب ع النت مش فى الصحافة

وكتاباته مميزة جدا جدا


العنتبلى : منا عارف إنه بيكتب فى الجرنال

وبعدين يدخل الجرنال فى الشاشة عشان الناس تشوفه عالنت

ايه انتوا فاكرينى جاهل ولا إيه .. ؟

!!


حاتم : لا ياعمى العفو
!!


عفاف : يابابا هو فيه جرنال فى الدنيا بيدخل فى الشاشة بردوا .. ؟

هو مين اللي قالك كدة .. ؟


العنتبلى : واحد صاحبى متعلم كدا ومتنور ومعاه تالتة إبتدائى

!!

هو اللي قالي إن الأخبار اللي بتشوفوها ع النت

عبارة عن جرايد بيدخلوها من فتحات الشاشة الى ورا


عفاف : تالتة إبتدائى
!!

يا بابا , الكلام دة غلط ومافيش جرايد بتدخل من الشاشة ولا حاجة

بالنسبة للأخبار دى عبارة عن كلام مطبوع ع النت


العنتبلى : شوفى يا بنتى إنتى وهو من الاخر كدا

لو فضلتم سنة تتكلموا عن النت دة مش هفهم بردوا

المهم دلوقتى

بسلامته بقى والدك مش موافق ليه .. ؟


هو احنا مش قد المقام يعني ولا ايه .. ؟
!!

حاتم : لا ياعمى العفو دة شرف ليهم إنهم يناسبوا حضرتك انت وطنط


الأم : طنط .. ؟
!!

طنط مين يا ضنايا .. ؟
!!

عفاف : اهدي بس يا ماما هو يقصد إنه يحترمك مش أكتر


حاتم : أيوة طبعا زى ما قالت عفاف كدة بالضبط


الأم : بس معلشى يابنى لا طنط ولا مدموذيل اقولك

قولي يا حاجة أحسن


حاتم : حاضر يا حاجة


العنتبلى : طيب لما هو شرف ليهم مش موافقين ليه بقى .. ؟


عفاف : هو يقصد يا بابا إنهم مش موافقين على الطريقة نفسها

يعنى الزواج عن طريق النت


العنتبلى : طب ليه يا بنتى مش دة جواز على سنة الله ورسوله .. ؟


حاتم : أكيد يا عمي بس تقول ايه بقى ربنا يهديهم
!!

يــتــبــعــ

العنتبلي : طيب ممكن بقي تقولى ازاي بنتي عجبتك من غير ما تشوفها حتى

يعنى انت أصلا جاي بناءا على ايه .. ؟

نظر حاتم إلى عفاف وهو يقول

حاتم :عجبتنى مشاركاتها يا عمي

مواضيعها وردودها يعني

العنتبلي : مواضيع ايه يابني دي اللي عمال تتكلم عليها أنا مش فاهم حاجه
!!

حاتم : ياعمي اسمعني بس أنا هقول لحضرتك علي كل حاجه

العنتبلي : وادينا سامعين اهو لما نشوف اخرتها ايه

حاتم : بص ياعمي أنا قابلتها أول مرة فى موضوع كان عن السجاير

كلامها لفت نظري اوي

ولقيتها مرة واحدة مشاركة فى موضوع ليا عن الكورة

وأقنعتنى بكلامها إن الكورة دى للفاضيين

ومش ممكن واحد مسلم يكون بيحس بإخوانه فى العراق وفلسطين

يقعد يكتب موضوع عن الكورة ويشجع الأهلي

العنتبلى : اخص عليكي يا عفاف بقى كدا خلتيه يشجع الزمالك بدل الأهلي .. ؟
!!

حاتم: لا ياعمى ماقصدش دا هيا خليتنى أسيب الكورة نهائي

واشجع الوحدة الإسلامية وبس

دا بعد ما اقتنعت بكلامها طلبت من الموديراتور إنه يقفل الموضوع

و

..


قاطعه العنتبلى : طلبت من مين يا خويا .. ؟

حاتم : الموديراتور

العنتبلى: ويطلع ايه الموتور ده كمان .. ؟

عفاف: يقصد المشرف يا بابا

يعني اللي بينظم المكان

العنتبلي : طيب

حاتم : المهم بقى

بدأت اعجب بيها وأتابع مشاركاتها ومشيت وراها فى كل موضوع تروحه

خرجت من ساحة الشباب للمنتدى السياسى

خرجت وراها لقيتها شاركت فى موضوع عن بوش وشارون قمت شاركت معاها

وشكرتها على مشاركتها ونسيت خالص اشكر صاحب الموضوع الأصلي

رغم انها أصلا كانت داخلة تشكره فشكلى كان نيلة اوووي ساعتها

ولقيتها سابت السياسة وراحت لمنتدي الأخوات فى موضوع تعارف

وأنا كنت ماشى وراها زي المسحور فشاركت بعد مشاركتها على طول

رغم إن الموضوع للأخوات فقط وما أخذتش بالى إلا لما المشرف وقفني

وعلى ما سجلت بإسم جديد مؤقتا لقيتها فى المنتدى العام

بتشارك فى موضوع للنكت فقلت اهو فرصة اكتبلها نكتتين كدا يضحكوها قبل ما

تشارك هيا

وفعلا كتبت نكت جامدة اوي وقلت أكيد هتضحك

لقيتها كاتبة عتاب طوووويل عريض لصاحب الموضوع

بإن النكت دى ما يصحش تتقال فى منتدى اسلامى

وبتنصحه إنه يشيل الموضوع ويراجع نيته

لقيتها دخلت منتدى الألعاب ودخلت موضوع شمس وقمر قلت ايه

اهو فرصة نلعب سوا

فدخلت قلت شمس قبل ما هيا تقول قمر

واستنيتها كتيـــــــــر تقول قمر بس مفيش فايدة

فقلت لنفسى معقولة دة كله بتكتب ثلاث حروف .. ؟
!!

ولا يمكن بترسملهم القمر نفسه

المهم بعد 5 دقائق لقيتها رازعة صاحب الموضوع كلمتين

عن المشاركات الهادفة والجد ومراعاة ظروف المسلمين المعتقلين

والمعذبين والمقتولين لغاية ما نفسى غمت عليا

فسحبت كلمة شمس وكتبت بدالها تحيا الوحدة الإسلامية

وقلت البنت دى لازم تبقى من نصيبي

لأنها ايجابية جدا ومحترمة جدا

فطلبت ايميلها من المشرف قالي ممنوع

حاولت أقنعه وقلتله ياعم يرضيك ويرضيك ابدا مافيش فايدة

طبعا الأب والأم قاعدين مسبهلين ومش فاهمين أي حاجة

!!

ويستمعون لحاتم ويؤئمون برؤوسهم كأنهم فاهمين

ولكن عفاف كانت تبتسم وقالت :

امال عرفت ايميلى ازاى .. ؟

حاتم : قدرا

لقيتك كاتباه لواحدة صحبتك قمت اخدته على طول

!!

يــتــبــعــ

العنتبلي : هو احنا إن شاء الله مش هنخلص النهاردة ولا ايه .. ؟

حاتم : أنا آسف يا عمي

بس أكيد حضرتك موافق طبعا

!!

الأم : يوافق على إيه يا جدع انت هو سلق بيض ولا ايه


الأب : انت عاوزنى أوافق على ايه هو انت قلت حاجة عشان اوافق عليها .. ؟

حاتم : طبعا ياعمى على عرضى للزواج من كريمتكم عفاف

الأب : انت فاكر اننا هنقبلك كدة بطولك من غير ما والدك ووالدتك يوافقوا و نتفاهم

على كل التفاصيل

حاتم : وفيها ايه ياعمى بس .. ؟
!!

هو مش أنا اللي هتجوز بقى ولا هما .. ؟

العنتبلي وقد فاض به الكيل : اسمع ياد انت

بقى أنا صابر عليك من الصبح وإنت عمال تحكيلى قصة حياتك ولا كأنك صلاح الدين

وبعدين عمال تقولي كنت بجرى ورا البت ع النت

من موضوع لموضوع لغاية ما قطعت نفسى وجيت اتقدمتلها

نيجي بقى للمفيد

إذا كنت فاكر إنك هتضحك علينا بالخمسة كيلو موز دول اللي انت جايبهم

فأنت غلطان دة أنا ممكن أزحلقك بيهم ودلوقتى كمان

لو عاوز تخطب عفاف فعلا هاتلي أبوك وأمك عشان نتفاهم

غير كدة بقى خليك مقضيها مواضيع ع النت احسنلك

أما عفاف فـ هيا قاعدة معانا اهي بتاكل و بتشرب

ولو ما نفعتشي فى الجواز بسيطه خالص ممكن ندبحها عالعيد

مافيش أى مشاكل

!!

عفاف : يا بابا بس

قاطعها العنتبلى : اخرسى يا بت انتى وقومي خشي جوة

حاتم: ماهو ياعمي أنا كنت ناوى

وقاطعه العنتبلى : ناوي ايه بقى .. ؟

بقالك نص ساعة ناوى .. ؟

!!

على ما تعمل حاجة هيكون اليوم خلص

أنا خلصت كل اللي عندى روح شاور اهلك

والمرة الجاية لو فيه يعنى هاتهم معاك

حاتم : طب يا عمى ممكن

قاطعه العنتبلى مرة أخرى : بقولك ايه .. ؟

في جاموسة هنروح ندبحها كمان شوية لو أخرتنى ممكن أ

حاتم وهو مذعورا : لالالالا يا عمى وعلى إيه , سلامو عليكم


العنتبلي : وعليكم السلام يا
!!

ياسي طالب افندى

قـــــال عريس من النت قـــــال

شوية شوية تجيبيلى عريس من الإنترنت

!!!!!!!!!!!!!!!!!!!!!!!!!!

تــمــتــ

ههههههههه عثل والله عثل يابنت الايه ووحشتينى من زمان والمنتدى مفتقدك ومفتقد مواضيعك وحمد الله على سلامه جهاز الكومبيوتر عندكم هههههههههههههههههه

مرسى ليك
والله الحمدلله الجهاز ربنا شفاه بس للاسف الكليات بدات وبقى صعب دخول النت

ههههههههههههههههه

ههههههههههههههههههههههههههههه